وش المعدات المناسبة لبداية مشروع تصوير المناسبات ؟

قياسي

صباح الخير / مساء الخير لك اخي القارئ كما عودتكم كل فترة انزل لكم موضوع خفيف لطيف
بخصوص وش ممكن تاخذ معدات في بداية مشروع بالتصوير راح تنصدم اذا قلت لك تحتاج فقط كاميرا + سبيد لايت + العدسة الاساسية

فعلاً انت في بداية مشروعك راح تحتاج هذي الاشياء الاساسية فقط مع فهم وتوجيه الاضاءة السبيد لايت و معرفة تامة لمثلث التعريض

الكاميرا

كاميرا اي كان موديلها سوني كانون نيكون فوجي الاهم ان موديلها حديث

العدسة

العدسة الاساسية اللي تجي مع الكاميرا او اي عدسة يفضل فتحتها تكون واسعة ٢.٨ او ١.٨ او حتى العدسة الاساسية اللي بتستخدمها وليش دايم ننصح بعدسات ثابته من ناحية فتحه العدسة لان بعض العدسات المتغيرة فتحه العدسة اذا عملت زوم راح تتغير معك فتحة العدسه وتضطر انك تغير باعدادات الكاميرا فالافضل انك تستخدم عدسه ثابته فتحه العدسه فيها او ممكن تثبت الزوم معك وتستخدم على زوم معين ماتختلف فيه فتحه العدسة .

الفلاش

ايضاً سبيد لايت من اي نوع لاكن انصح بال Godox اي نوع لان بطاريته ليثيوم وتطول بالتصوير يجي اصدارات تلقونه عند احمد عبدالواحد وكيلة بالسعودية اصدارات لنيكون و كانون وسوني .

ملاحظة باي تصوير حاول وزن الاضاءة وانت تستخدم الفلاش بوضعية منيول تتحكم بقوة الفلاش الارقام اللي تظهر لك قوة الومضة اذا الرقم كبير ١/١٢٨ يعني الومضة خفيفة اذا صار الرقم صغير ١/٢ يعني الومضة قوية

حط في بالك المسافة بين الفلاش والسقف تأثر بقوة الاضاءة وايضاً لون السقف وايضاً التجويفات تأثر بانتشار الاضاءة .

مثلث التعريض

لاتنسى ان الجهد الاكبر هو عليك بفهم مثلث التعريض واستخدام الاعدادات سرعه الشتر – فتحة العدسة – الايزو راح توزنها على ماترغب فيه ان يظهر بالصور .

تم التطرق له في المدونة بشكل موسع
http://www.bassurah.com/?p=166

كيف تصبح مصور مناسبات ناجح بخطوتين

قياسي

كيف تصبح مصور مناسبات محترف في خطوتين

اكيد ماراح يكون العنوان صحيح ولا راح تكون خطوتين ابد في هذي التدوينة راح اشرح لك كيف تكون مصور مناسبات او مصور زواجات ناجح في عدة خطوات اقراها جيد واي استفسار انا حاضر .

التصوير الفوتوغرافي هواية ويمكنك إذا كنت شخص صبور واجتماعي يكون علاقات بين الناس انك تستغل هذي الهواية وتحولها لمصدر دخل مجزي لك ولعائلتك .

وانا هنا في المدونة راح أقدم لك أفضل النصائح عشان توصل وتكون مصور مناسبات وزواجات محترف.

  • الصبر وطول البال “كلها ضغطت زر“

كثير من العملاء مايفهم طريقة عمل المصور وكيف انه يتعب على الصور بتعديل وتنقيحها ورفع الصور على موقع للعميل اللي اتفقت معه اللي هو العريس ، راح ياخذ رقمك شخص شخصين بالمناسبة وانا عندي زواج قريب وابيك تصورني صورة وترسلها لي اليوم وراح اكلمك زواج احد الاقارب قريب وابي اجيبك خلك طويل بال وصوره وخله يخزن رقمك عنده والا مايجي يوم ينشب لك ويدق سواء يبي صورته او حتى يبيك تجي تصور فخلك طويل بال ولاتنسى تاخذ الاذن من العريس انك ترسل الصوره للرجال واذا وافق عطه اياه .

  • تكون عندك كاريزما 

لازم تكون عندك كاريزما وانك توضح للعريس قبلها بيوم ان بعض الملاحظات لازم يمشي عليها وفيه ترتيب معين انت لازم تمشي عليه عشان صورك تكون جميلة وعليها الكلام منها الحلاقه مو لازم يوم العرس تحلق ويصير وجهك احمر من الصنفره او متحسس قبلها بيوم حلق يرتاح وجهك شوي والصور تكون افضل توجيه العريس باخذ الصور مع والده وابو زوجته للصور الرئيسية ومع اخوانه ووالدة الخ من المتطلبات لازم تضع بصمتك وتمشي العريس على الاشياء اللي انت تبي تخلص له اياها عشان مايكون فيه شيء ناقص عليك من صور المناسبة.

  • تسوق لنفسك 

تسويقك لنفسك مو بس بالكروت اللي طابعها ١٠٠٠ حبه ب ١٠٠ ريال وكاشخ فيها توزعها بالطاولات للاسف هذي تبين انك مصور غير محترف كمصور محترف تطبع ١٠٠ كرت وتعطي اللي يطلبونها فقط ، تسويقك لنفسك مو لازم يكون مباشر وانا مصور اذا احتجتني تحت امرك اكيد انت مصور وماجيت المناسبة ومعك كاميرا قد راسك الا وهم عارفين انك مصور مناسبات ، واكيد لمن يشوفون صورك عبر رابط اللي شاركه العريس لأهله راح تحط اللوجو ووسيلة اتصال فيك او حتى رابط الانستقرام الخاص بك بكذا انت سوقت نفسك بطريقة غير مباشرة .

  • اختيار الزاوية المناسبة 

الناس ملت من الصور اللي نفس الشكل خلفية جدار وكل ما جا شخص يصور صورة كانهم لاعبين اندية ومنتخب ، الصور العفوية مطلوبه خصوصاً اللي فيها ابتسامة وتحكي واقع المناسبة اللي انت حضرتها فرح ضحك ابتسامة 😃 والعفوية مطلوبة بالصور 

  • الفوكس 

الفوكس والعزل للخلفية ايضاً راح تطلع برى الصندوق لمن تصور صور خلفيتها اضاءة المكان والاستفادة من البوكية اللي يطلع بالخلفية استغلال الخلفيات والاضاءات اللي بالقاعة راح تطلع معك شغل بالخلفية ماراح تصدقة .

  • التصوير بصيغة الرو RAW:

حاول انك تستخدم صيغة الرو عشان تصور بالحجم الكامل والجودة الكاملة للصورة بحيث يعطيك مدى اكثر بالتعديل وراح تقلل من الصور التالفة عندك وراح تستغل كل صورة لتعديلها و تنظيف الصور وتنقيحها و اضافة التون المناسب للصورة يعطيها طابع خاص .

  • تسليم الصور والباكج

اهتم كثير بالتفاصيل الباكج المرتب اللي راح تقدمه للعميل واذا قدرت تعطره او تبخره قبل ما تسلمه للعميل افضل .